zindaa raheN to kyaa hai jo mar jaayeN ham to kyaa - Munir Niazi

zindaa raheN to kyaa hai jo mar jaayeN ham to kyaa
duniyaa meN Khaamoshii se guzar jaayeN ham to kyaa

hastii hii apanii kyaa hai zamaane ke saamane
ek Khwaab haiN jahaaN meN bikhar jaayeN ham to kyaa

ab kaun muntazir hai hamaare liye wahaaN
shaam aa ga_ii hai lauT ke ghar jaayeN ham to kyaa

[muntazir = waiting]

dil kii Khalish to saath rahegii tamaam umr
dariyaa-e-Gam ke paar utar jaayeN ham to kyaa

wo kaun hai duniyaa meN jise Gam nahiiN hotaa - Riaz Khairabadi

wo kaun hai duniyaa meN jise Gam nahiiN hotaa
kis ghar meN Khushii hotii hai maatam nahiiN hotaa

aise bhii haiN duniyaa meN jinheN Gam nahiiN hotaa
ek ham haiN hamaaraa Gam kabhii kam nahiiN hotaa

kyaa surmaabharii aaNkhoN se aaNsoo nahiiN bahate
kyaa mehandii lage haathoN se maatam nahiiN hotaa

kuchh aur bhii hotii haiN bigaRane kii adaayeN
par merii samajh meN ye ek aalam nahiiN hotaa
​

tarz jeene kaa sikhatii hai mujhe  - Khalil ur Rahman Azmi

tarz jeene kaa sikhatii hai mujhe 
tashnagii zahar pilaatii hai mujhe 

[tarz=style; tashnagii=thirst] 

raat bhar rahatii hai kis baat kii dhun 
na jagaatii hai na sulaatii hai mujhe 

rooThataa hooN jo kabhii duniyaa se 
zindagii aake manaatii hai mujhe 

aa_iinaa dekhooN to kyooNkar dekhooN 
yaad ik shaKhs kii aatii hai mujhe 

baNd karataa hooN jo aaNkheN kyaa kyaa 
roshanii sii nazar aatii hai mujhe 

ko_ii mil jaaye to raastaa kaT jaaye 
apanii parachaa_ii Daraatii hai mujhe 

ab to ye bhool gayaa kis kii talab 
des parades phiraatii hai mujhe 

[talab=desire] 

kaise ho Khatm kahaanii Gam kii 
ab to kuchh neeNd sii aatii hai mujhe

neeyat-e-shauq bhar na jaaye kahiiN - Nasir Kazmi

neeyat-e-shauq bhar na jaaye kahiiN 
too bhii dil se utar na jaaye kahiiN 

aaj dekhaa hai tujhe der ke baad 
aaj kaa din guzar na jaaye kahiiN 

na milaa kar udaas logoN se 
husn teraa bikhar na jaaye kahiiN 

aarazoo hai ke too yahaaN aaye 
aur phir umr bhar na jaaye kahiiN 

jee jalaataa hooN aur ye sochataa hooN 
raayegaaN ye hunar na jaaye kahiiN 

aao kuchh der ro hii leN 'Nasir'
phir ye dariyaa utar na jaaye kahiiN 

jab merii haqeeqat jaa jaa kar un ko sunaa_ii logoN ne - Ibrahim Ashk

jab merii haqeeqat jaa jaa kar un ko sunaa_ii logoN ne 
kuchh sach bhii kahaa kuchh jhooTh kahaa kuchh baat banaa_ii logoN ne 

DhaayeN haiN hameshaa zulm-o-sitam duniyaa ne muhabaat waaloN par 
do dil ko kabhii milane na diyaa deewaar uThaa_ii logoN ne 

aaNkhoN se na aaNsoo poNch sake hoNThoN pe Khushii dekhii na ga_ii 
aabaad jo dekhaa ghar meraa to aag lagaa_ii logoN ne 

tanhaa_ii kaa saathii mil na sakaa ruswaa_ii meN shaamil shahar huaa 
pahale to meraa dil to.D diyaa phir iid manaa_ii logoN ne 

is daur meN jeenaa mushkil hai ai 'Ashk' ko_ii aasaaN nahiiN 
har ik qadam par marane kii ab rasm chalaa_ii logoN ne

​terii Khushboo kaa pataa karatii hai - Parveen Shakir

terii Khushboo kaa pataa karatii hai 
mujh pe ehasaan hawaa karatii hai 

shab kii tanhaa_ii meN ab to aksar 
guftagoo tujh se rahaa karatii hai 

dil ko us raah pe chalanaa hii nahiiN 
jo mujhe tujh se judaa karatii hai 

zindagii merii thii lekin ab to 
tere kahane meN rahaa karatii hai 

us ne dekhaa hii nahiiN warnaa ye aaNkh 
dil kaa ehawaal kahaa karatii hai 

beniyaaz-e-kaaf-e-dariyaa angusht 
ret par naam likhaa karatii hai 

shaam paRate hii kisii shaKhs kii yaad 
koochaa-e-jaaN meN sadaa karatii hai 

mujh se bhii us kaa hai waisaa hii sulook 
haal jo teraa anaa karatii hai 

dukh huaa karataa hai kuchh aur bayaaN 
baat kuchh aur huaa karatii hai 

abr barase to inaayat us kii 
shaaKh to sirf duaa karatii hai 

masalaa jab bhii uThaa chiraaGoN kaa 
faisalaa sirf hawaa karatii hai 

ai mohabbat tere anjaam pe ronaa aayaa - Shakeel Badayuni

ai mohabbat tere anjaam pe ronaa aayaa
jaane kyoN aaj tere naam pe ronaa aayaa

[anjaam = result]

yooN to har shaam ummeedoN meN guzar jaatii thii
aaj kuchh baat hai jo shaam pe ronaa aayaa

[ummeed = hope]

kabhii taqadeer kaa maatam kabhii duniyaaa kaa gilaa
manzil-e-ishq meN har gaam pe ronaa aayaa 

[maataam = mourning; gaam=step]

jab huaa zikr zamaane meN mohabbat kaa 'Shakeel'
mujh ko apane dil-e-naakaam pe ronaa aayaa

faqiraana aaye sadaa kar chale - Meer Taqi Meer

faqiraana aaye sadaa kar chale 
miyaaN Khush raho ham duaa kar chale
 
jo tujh bin na jeene ko kahate the ham 
so is ahd ko ab wafaa kar chale
 
ko_ii naa-ummeedaana karate nigaah
so tum ham se mooNh bhii chhipaa kar chale
 
bahot aarazoo thii galii kii terii 
so yaaN se lahoo meN nahaa kar chale 

dikhaaii diye yooN ki beKhud kiyaa 
hameN aap se bhii judaa kar chale 

jabeeN sajadaa karate hii karate ga_ii 
haq-e-bandagii ham adaa kar chale 

parastish kii yaaN taiin ki ayei but tujhe 
nazar meN saboN kii Khudaa kar chale 

ga_ii umr dar band-e-fikr-e-Gazal
so is fan ko aisaa baRaa kar chale

kaheN kyaa jo poochhe ko_ii ham se "Meer"
jahaaN meN tum aaye the, kyaa kar chale 
​

ranjish hii sahii dil hii dukhaane ke liye aa - Ahmed Faraz

ranjish hii sahii dil hii dukhaane ke liye aa 
aa phir se mujhe chhoR ke jaane ke liye aa

pahale se maraasim na sahii phir bhii kabhii to
rasm-o-rahe duniyaa hii niibhaane ke liye aa

kis kis ko bataayenge judaa_ii kaa sabab ham 
tuu mujh se Khafaa hai to zamaane ke liye aa 

kuchh to mere pindaar-e-muhabbat ka bharam rakh
tuu bhii to kabhii mujh ko manaane ke liye aa

ek umr se hooN lazzat-e-giriyaa se bhii maharoom 
ai raahat-e-jaaN mujh ko rulaane ke liye aa 

ab tak dil-e-Khush_faham ko tujh se haiN ummeedeN 
ye aaKhirii shammeN bhii bujhaane ke liye aa 


The following ashaar are by Talib Baghpati but are often sung/quoted with this ghazal.

maanaa ki muhabbat kaa chhipaanaa hai muhabbat 
chup ke se kisii roz jataane ke liye aa 

jaise tujhe aate haiN na aane ke bahaane 
aise hii kisii roz na jaane ke liye aa 

​rahii naguftaa mere dil meN daastaaN merii - Meer Taqi Meer

rahii naguftaa mere dil meN daastaaN merii 
na is dayaar meN samajhaa ko_ii zabaaN merii

barang-e-saut-e-jaras tujh se door hooN tanahaa 
Khabar nahiiN hai tujhe aah kaarawaaN merii

usii se door rahaa asl-e-muddaa jo thaa 
ga_ii ye umr-e-azeez aah raayagaaN merii

tere firaaq meN jaise Khayaal muflis kaa 
ga_ii hai fikr-e-pareshaaN kahaaN kahaaN merii

diyaa dikhaaa_ii mujhe to usii kaa jalwaa "Meer" 
paRii jahaaN meN jaa kar nazar jahaaN merii