ham ko kis ke Gam ne maaraa ye kahaanii phir sahii - Masroor Anwar

ham ko kis ke Gam ne maaraa ye kahaanii phir sahii
kis ne toRaa dil hamaaraa ye kahaanii phir sahii 

dil ke luTane kaa sabab poochho na sab ke saamane 
naam aayegaa tumhaaraa ye kahaanii phir sahii 

sabab = reason

nafaratoN ke teer khaa kar dostoN ke shahar meN
ham ne kis kis ko pukaaraa ye kahaanii phir sahii 

kyaa bataayeN pyaar kii baazii wafaa kii raah meN
kaun jeetaa kaun haaraa ye kahaanii phir sahii 

​baazii = bet, gamble; wafaa = fidelity, faithfulness
​

ik sazaa aur aseeroN ko sunaa dii jaaye - Pirzada Qasim

ik sazaa aur aseeroN ko sunaa dii jaaye
yaanii ab jurm-e-aseerii kii sazaa dii jaaye

sazaa = punishment; aseer = prisoner; yaanii = it means, hence; ab = now; aseerii = imprisonment; jurm = crime;

us kii Khwaahish hai ke ab na royeN na haNsen
behisii waqt kii aawaaz banaa dii jaaye

Khwaahish = desire; behisii = insensible/deprived of all senses

dasht-e-naa_deedaa kii tahaqeeq zaroorii hai magar
pahale jo aag lagii hai wo bujhaa dii jaaye

sirf jalanaa hii nahiiN ham ko bhaRakanaa bhii to hai
ishq kii aag ko laazim hai hawaa dii jaaye

sirf sooraj kaa nikalanaa hai subah to phir
ek shab aur mere shab se milaa dii jaaye

aur ik taazaa sitam us ne kiyaa hai iijaad
us ko is baar zaraa khul ke duaa dii jaaye

benaam saa ye dard Thahar kyooN nahiiN jaataa - Nida Fazli

benaam saa ye dard Thahar kyooN nahiiN jaataa
jo beet gayaa hai wo guzar kyooN nahiiN jaataa

sab kuchh to hai kyaa DhooNDhatii rahatii haiN nigaaheN
kyaa baat hai maiN waqt pe ghar kyooN nahiiN jaataa

wo ek hii cheharaa to nahiiN saare jahaaN meN
jo door hai wo dil se utar kyooN nahiiN jaataa

maiN apanii hii ulajhii huii raahoN kaa tamaashaa
jaate haiN jidhar sab maiN udhar kyooN nahiiN jaataa

wo naam jo barasoN se na cheharaa na badan hai
wo Khwaab agar hai to bikhar kyooN nahiiN jaataa
​

aaNkhoN meN rahaa dil meN utar kar nahiiN dekhaa - Bashir Badr

aaNkhoN meN rahaa dil meN utar kar nahiiN dekhaa
kashtii ke musaafir ne samandar nahiiN dekhaa

kashtii = boat; musaafir - passenger; samandar = ocean

bewaqt agar jaa_ooNgaa sab chauNk paRenge
ek umr hu_ii din meN kabhii ghar nahiiN dekhaa

bewaqt = untimely; chauNkanaa = surprised

jis din se chalaa hooN merii manzil pe nazar hai
aaNkhoN ne kabhii meel ka patthar nahiiN dekhaa

manzil = destination/goal; meel kaa patthar = milestone

mah_boob kaa ghar ho ki buzurgoN kii zameeneN
jo chhoR diyaa phir use muR kar nahiiN dekhaa

mah_boob = beloved; buzurgoN = elders

patthar mujhe kahataa hai mujhe chaahanewaalaa
main mom hooN use ne mujhe choo kar nahiiN dekhaa

mom = wax

sarakatii jaaye hai ruKh se naqaab aahistaa aahistaa - Ameer Minai

sarakatii jaaye hai ruKh se naqaab aahistaa aahistaa
nikalataa aa rahaa hai aftaab aahistaa aahistaa

sarakanaa = to slide; ruKh = face; naqaab = veil; aftaab = sun; aahistaa = slowly

jawaaN hone lage jab wo to hum se kar liyaa pardaa
hayaa yak_laKht aa_ii aur shabaab aahistaa aahistaa

jawaaN honaa = grow up; hayaa = shyness; yak_laKht = all of a sudden; shabaab = beauty

shab-e-furqat kaa jaagaa hooN farishto ab to sone do
kahiiN fursat meN kar lenaa hisaab aahistaa aahistaa

shab-e-furqat = night of separation; farishto = angels; fursat = leisure; hisaab = accounting

sawaal-e-wasl par un ko udoo kaa Khauf hai itanaa
dabe hoNThoN se dete haiN jawaab aahistaa aahistaa

sawaal = question; wasl = meeting/union; udoo = enemy; Khauf = fear; jawaab = answer

wo bedardii se sar kaaTeN "Ameer" aur main kahooN un se
huzoor aahistaa aahistaa janaab aahistaa aahistaa

bedardii = cruel/unfeeling;

kuchh din to baso merii aaNkhoN meN - Obaidullah Aleem

kuchh din to baso merii aaNkhoN meN 
phir Khwaab agar ho jaao to kyaa 

ko_ii rang to do mere chehare ko 
phir zaKhm agar mahakaao to kyaa 

ik aa_iinaa thaa so TooT gayaa 
ab Khud se agar sharmaao to kyaa 

maiN tanhaa thaa maiN tanhaa hooN 
tum aao to kyaa na aao to kyaa 

jab ham hii na mahake phir saahib 
tum baad-e-sabaa kahalaao to kyaa 

jab dekhane waalaa ko_ii nahiiN 
bujh jaao to kyaa jal jaao to kyaa
​

tere pyaar meN ruswaa ho kar jaaye kahaaN deewaane log - Obaidullah Aleem

tere pyaar meN ruswaa ho kar jaaye kahaaN deewaane log 
jaane kyaa kyaa poochh raheN haiN ye jaane pah_chaane log 

jaise tumheN ham ne chaahaa thaa kaun bhalaa yooN chaahegaa 
maanaa aur bahut aayeNge tum se pyaar jataane log 

kaise dukhoN ke mausam aaye kaisii aag lagii yaaro 
ab saharaaoN se laate haiN phooloN ke nazaraane log 

kal maatam beqeemat hogaa aaj in kii tauqeer karo 
dekho Khoon-e-jigar se kyaa kyaa likhate haiN afsaane log 

[tauqeer=respect] 

jaanate haiN ye ishq musal_sal rog hai aah-o-zaarii kaa 
phir bhii us ke kooche meN jaate haiN umr gawaane log 
​