sadamaa to hai mujhe bhii ki tujh se judaa hooN maiN - Qateel Shifai

sadamaa to hai mujhe bhii ki tujh se judaa hooN maiN 
lekin ye sochataa hooN ki ab teraa kyaa hooN maiN 

bikharaa paRaa hai tere hii ghar meN teraa wajood 
bekaar mahafiloN meN tujhe DhooNDhataa hooN maiN 

maiN Khud_kashii ke jurm kaa karataa hooN aitaraaf 
apane badan kii qabr meN kab se gaRaa hooN maiN 

kis-kisakaa naam laaooN zabaaN par ki tere saath 
har roz ek shaKhs nayaa dekhataa hooN maiN 

naa jaane kis adaa se liyaa toone mera naam 
duniyaa samajh rahii hai ke sab kuchh teraa hooN maiN 

le mere tajurboN se sabak ae mere raqeeb 
do chaar saal umr meN tujh se baRaa hooN maiN 

jaagaa huaa zameer wo aa_iinaa hai "Qateel" 
sone se pahale roz jise dekhataa hooN maiN 

har tarah ke jazbaat kaa elaan haiN aaNkheN - Sahir Ludhianvi

har tarah ke jazbaat kaa elaan haiN aaNkheN
shabnam kabhii shola kabhii toofaan haiN aaNkheN

aaNkhoN see baRii ko_ii taraazoo nahiiN hotii
tulataa hai bashar jis meN wo mizaan haiN aaNkheN

aaNKheN hii milaatii haiN zamaane meN diloN ko
anjaan haiN ham tum agar anjaan haiN aaNkheN

lab kuchh bhii kaheN is se haqeeqat nahiiN khulatii
insaan ke sach jhooTh kii pahachaan haiN aaNkheN

aaNkheN na jhukeN terii kisii Gair ke aage
duniyaa meN baRii merii jaan haiN aaNkheN

raat sun_saan dasht-o-dar Khaamosh - Himayat Ali Shaayar

raat sun_saan dasht-o-dar Khaamosh
chaaNd sitaare shajar hajar Khaamosh

[shajar = tree; hajar = stone]

ko_ii aawaaz-e-paa na baang-e-jaras
kaarawaaN aur is qadar Khaamosh

[baang-e-jaras = sound of the caravan bell]

har taraf ek muhiib sannaaTaa
dil dhaRakataa to hai magar Khaamosh

huye jaate haiN kis liye aaKhir
ham_safar baat baat par Khaamosh

haiN ye aadaab-e-rah_guzar ke Khauf
raah_rau chup haiN raahabar Khaamosh

muKhtasar ho na ho shab-e-taareek
ham ko jalanaa hai raat bhar Khaamosh

jaane kyaa baat kar rahe the ki ham
ho gaye ek naam par Khaamosh

paa-ba-gil sab haiN rihaa_ee kii kare tadabeer kaun - Parveen Shakir

paa-ba-gil sab haiN rihaa_ee kii kare tadabeer kaun
dast-bastaa shahar meN khole meree zanjeer kaun

[rihaa_ee = freedom; tadabeer = solution/way]
[dast-bastaa = tied hands]

meraa sar haazir hai lekin meraa munsif dekh le
kar rahaa hai mere fard-e-jurm kii tahareer kaun

[munsif = judge; fard-e-jurm = tale of guilt]
[tahareer = writing]

aaj darvaazoN pe dastak jaanee pahachaanee see hai
aaj mere naam laataa hai meree taazeer kaun

[taazeer = punishment]

neend jab KhvaaboN se pyaaree ho to aise ahad meN
Khvaab dekhe kaun aur KhvaaboN ko de taabeer kaun

[ahad = era/times]

ret abhee pichhale makaanoN kii na vaapas aa_ee thee
phir lab-e-saahil gharaundaa kar gayaa taameer kaun

[lab-e-saahil = on the shoreline; taameer = construct]

saare rishte hijratoN meN saath dete haiN to phir
shahar se jaate hue hotaa hai daaman_geer kaun

meree chaadar to chhinee thee shaam kii tanhaa_ee ne
beridaa_ee ko meree phir de gayaa tashaheer kaun

dushmanoN ke saath mere dost bhee aazaad haiN
dekhanaa hai kheNchataa hai mujh pe pahalaa teer kaun