Khaatir se yaa lihaaz se maiN maan to gayaa - Daag Dehlvi

Khaatir se yaa lihaaz se maiN maan to gayaa
jhooThii qasam se aap kaa iimaan to gayaa

dil le ke muft kahate haiN kuchh kaam kaa nahiiN
ulTii shikaayateN rahiiN ehasaan to gayaa

afshaaN-e-raaz-e-ishq meN go zillateN hu_iiN
lekin use jataa to diyaa jaan to gayaa

Darataa hooN dekh kar dil-e-be_aarazoo ko maiN
sun_saan ghar ye kyooN na ho mehamaan to gayaa

kyaa aa_ii raahat aa_ii jo kunj-e-mazaar meN
wo wal_walaa wo shauq wo aramaan to gayaa

dekhaa hai but_kade meN jo ai sheKh kuchh na poochh
iimaan kii to ye hai ki iimaan to gayaa

go naamaabar se kuchh na hu_aa par hazaar shukr
mujh ko wo mere naam se pahachaan to gayaa

bazm-e-udoo meN soorat-e-parawaanaa meraa dil
go rashq se jalaa tere qurbaan to gayaa

hosh-o-hawaas-o-taab-o-tawaaN 'daaG' jaa chuke
ab ham bhii jaane waale haiN saamaan to gayaa

har ek baat pe kahate ho tum ki tuu kyaa hai - Mirza Ghalib

har ek baat pe kahate ho tum ki tuu kyaa hai 
tumhiiN kaho ke ye andaaz-e-guftagoo kyaa hai 

na shole meN ye karishmaa na barq meN ye adaa 
koii bataao ki wo shoKh-e-tund_Khoo kyaa hai 

ye rashk hai ki wo hotaa hai ham_suKhan ham se 
wagarnaa Khauf-e-badaamozii-e-adoo kyaa hai 

[rashk=jealousy; ham_suKhan=some who agrees with you] 
[Khauf=fear; aamozii=teaching; adoo=enemy] 

chipak rahaa hai badan par lahoo se pairaahan 
hamaarii jeb ko an haajat-e-rafoo kyaa hai 

[pairaahan=dress/cloth/robe; haajat=need; rafoo=darning] 

jalaa hai jism jahaaN dil bhii jal gayaa hogaa 
kuredate ho jo ab raakh justajoo kyaa hai 

ragoN meN dauRate phirane ke ham nahiiN qaayal 
jab aaNkh hii se na Tapakaa to phir lahoo kyaa hai 

wo cheez jis ke liye ham ko ho bahisht azeez 
siwaaye baadaa-e-gulfaam-e-mushkaboo kyaa hai 

[bahisht = heaven; azeez = dear; siwaaye = except for]
[aadaa = wine; gulfaam = delicate/like a flower] 
[mushkaboo = the smell of musk] 

piyooN sharaab agar Khum bhii dekh looN do chaar 
ye sheeshaa-o-qadaah-o-koozaa-o-suboo kyaa hai 

[Khum = wine barrel, qadaah = goblet, suboo = wine pitcher ] 

rahii na taaqat-e-guftaar aur agar ho bhii 
to kis ummeed pe kahiye ke aarazoo kyaa hai 

[guftaar = speech] 

banaa hai shaah kaa musaahib phire hai itaraataa 
wagarnaa is shahar meN "Ghalib" kii aabaroo kyaa hai 

aaNdhii chalii to naqsh-e-kaf-e-paa nahiiN milaa - Mustafa Zaidi

aaNdhii chalii to naqsh-e-kaf-e-paa nahiiN milaa
dil jis se mil gayaa wo dubaara nahiiN milaa

[naqsh-e-kaf-e-paa = footprints]

ham anjuman meN sabakii taraf dekhate rahe
apanii tarah se ko_ii akelaa nahiiN milaa

aawaaz ko to kaun samajhataa ki door door
KhaamoshiyoN kaa dard_shanaasaa nahiiN milaa

[dard_shanaasaa = someone knowledgeable about pain]

kachche ghaRe ne jeet lii nadii chaRhii hu_ii
mazaboot kashtiyoN ko kinaaraa nahiiN milaa

Enjoy Abida Parveen's rendition of this lovely ghazal...