faqiraana aaye sadaa kar chale - Meer Taqi Meer

faqiraana aaye sadaa kar chale 
miyaaN Khush raho ham duaa kar chale
 
jo tujh bin na jeene ko kahate the ham 
so is ahd ko ab wafaa kar chale
 
ko_ii naa-ummeedaana karate nigaah
so tum ham se mooNh bhii chhipaa kar chale
 
bahot aarazoo thii galii kii terii 
so yaaN se lahoo meN nahaa kar chale 

dikhaaii diye yooN ki beKhud kiyaa 
hameN aap se bhii judaa kar chale 

jabeeN sajadaa karate hii karate ga_ii 
haq-e-bandagii ham adaa kar chale 

parastish kii yaaN taiin ki ayei but tujhe 
nazar meN saboN kii Khudaa kar chale 

ga_ii umr dar band-e-fikr-e-Gazal
so is fan ko aisaa baRaa kar chale

kaheN kyaa jo poochhe ko_ii ham se "Meer"
jahaaN meN tum aaye the, kyaa kar chale 
​

​rahii naguftaa mere dil meN daastaaN merii - Meer Taqi Meer

rahii naguftaa mere dil meN daastaaN merii 
na is dayaar meN samajhaa ko_ii zabaaN merii

barang-e-saut-e-jaras tujh se door hooN tanahaa 
Khabar nahiiN hai tujhe aah kaarawaaN merii

usii se door rahaa asl-e-muddaa jo thaa 
ga_ii ye umr-e-azeez aah raayagaaN merii

tere firaaq meN jaise Khayaal muflis kaa 
ga_ii hai fikr-e-pareshaaN kahaaN kahaaN merii

diyaa dikhaaa_ii mujhe to usii kaa jalwaa "Meer" 
paRii jahaaN meN jaa kar nazar jahaaN merii

mere saNg-e-mazaar par Farahaad - Meer Taqi 'Meer'

mere saNg-e-mazaar par Farahaad
rakh ke teshaa kahe hai 'yaa ustaad' 

saNg = stone; mazaar = tomb; Farahaad = of Shirin-Farhad fame;teshaa = axe 

ham se bin marg kyaa judaa ho malaal
jaan ke saath hai dil-e-naashaad 

marg = death; malaal = sorrow/life's difficulties; dil-e-naashaad = wretched heart 

fikr-e-taameer meN na rah muneem 
ziNdagii kii kuchh bhii hai buniyaad 

fikr = worry; taameer = construction; muneem = rich person;buniyaad = foundation 

Khaak bhii sar pe Daalane ko nahiiN 
kis Kharaabe meN ham huye aabaad 

Khaak = dust/ashes; Kharaabe = wasteland 

sunate ho tuk suno ki phir mujh baad 
na sunoge ye naalaa-o-fariyaad 

tuk = moment(here it means 'for a little while'); naalaa-o-fariyaad= wails and pleas

har taraf haiN aseer ham-aawaaz
baaG hai ghar teraa to ai sayyaad 

aseer = prisoner; ham-aawaaz = in one woice/in chorus; sayyad =hunter 

ham ko maranaa ye hai ke kab howe 
apanii qaid-e-hayaat se aazaad 

qaid = prison; hayaat = life 

chalate ho to chaman ko chaliye kahate haiN ke bahaaraaN hai - Meer

chalate ho to chaman ko chaliye kahate haiN ke bahaaraaN hai
paat hare haiN phool khile haiN kam kam baad-o-baaraaN hai

rang hawaa se yooN Tapake hai jaise sharaab chuwaate haiN
aage ho maiKhaane ke nikalo ahad-e-baad_gusaaraaN hai

dil hai daaGii jigar hai TukaRe aaNsoo the so Khoon huye
lahoo paanii ek kare ye ishq-e-laal-o-azaaraaN hai

kohakan-o-majanoo kii Khaatir dasht-o-koh meN ham na gaye
ishq meN ham ko 'Meer' nihaayat paas-e-izzat_daaraaN hai


Wishing all our readers a very happy, peaceful and prosperous New Year!