​terii Khushboo kaa pataa karatii hai - Parveen Shakir

terii Khushboo kaa pataa karatii hai 
mujh pe ehasaan hawaa karatii hai 

shab kii tanhaa_ii meN ab to aksar 
guftagoo tujh se rahaa karatii hai 

dil ko us raah pe chalanaa hii nahiiN 
jo mujhe tujh se judaa karatii hai 

zindagii merii thii lekin ab to 
tere kahane meN rahaa karatii hai 

us ne dekhaa hii nahiiN warnaa ye aaNkh 
dil kaa ehawaal kahaa karatii hai 

beniyaaz-e-kaaf-e-dariyaa angusht 
ret par naam likhaa karatii hai 

shaam paRate hii kisii shaKhs kii yaad 
koochaa-e-jaaN meN sadaa karatii hai 

mujh se bhii us kaa hai waisaa hii sulook 
haal jo teraa anaa karatii hai 

dukh huaa karataa hai kuchh aur bayaaN 
baat kuchh aur huaa karatii hai 

abr barase to inaayat us kii 
shaaKh to sirf duaa karatii hai 

masalaa jab bhii uThaa chiraaGoN kaa 
faisalaa sirf hawaa karatii hai 

paa-ba-gil sab haiN rihaa_ee kii kare tadabeer kaun - Parveen Shakir

paa-ba-gil sab haiN rihaa_ee kii kare tadabeer kaun
dast-bastaa shahar meN khole meree zanjeer kaun

[rihaa_ee = freedom; tadabeer = solution/way]
[dast-bastaa = tied hands]

meraa sar haazir hai lekin meraa munsif dekh le
kar rahaa hai mere fard-e-jurm kii tahareer kaun

[munsif = judge; fard-e-jurm = tale of guilt]
[tahareer = writing]

aaj darvaazoN pe dastak jaanee pahachaanee see hai
aaj mere naam laataa hai meree taazeer kaun

[taazeer = punishment]

neend jab KhvaaboN se pyaaree ho to aise ahad meN
Khvaab dekhe kaun aur KhvaaboN ko de taabeer kaun

[ahad = era/times]

ret abhee pichhale makaanoN kii na vaapas aa_ee thee
phir lab-e-saahil gharaundaa kar gayaa taameer kaun

[lab-e-saahil = on the shoreline; taameer = construct]

saare rishte hijratoN meN saath dete haiN to phir
shahar se jaate hue hotaa hai daaman_geer kaun

meree chaadar to chhinee thee shaam kii tanhaa_ee ne
beridaa_ee ko meree phir de gayaa tashaheer kaun

dushmanoN ke saath mere dost bhee aazaad haiN
dekhanaa hai kheNchataa hai mujh pe pahalaa teer kaun

nazar ke saamane ik raastaa zaroorii hai - Parveen Shakir

nazar ke saamane ik raastaa zaroorii hai
bhaTakate rahane kaa bhii sil_silaa zaroorii hai

misaal-e-abr-o-hawaa dil_baham raheN lekin
muhabbatoN meN zaraa faasalaa zaroorii hai

wo Khauf hai ke sar-e-shaam ghar se chalate waqt
galii kaa door talak jaayazaa zaroorii hai

ta_alluqaat ke naam-o-tibar hawaaloN se
tamaam umr kaa ik raawitaa zaroorii hai