Khoobsoorat moR - Sahir Ludhianvi

chalo ik baar phir se ajanabii ban jaayeN ham donoN 

na maiN tum se ko_ii ummeed rakhooN dil nawaazii kii 
na tum merii taraf dekho Galat aNdaaz nazaroN se 
na mere dil kii dha.Dakan laRakhaRaaye merii baatoN meN 
na zaahir ho tumhaarii kashmakash kaa raaz nazaroN se 

ta'arruf rog ho jaaye to us ko bhoolanaa behatar 
ta'alluq bojh ban jaaye to us ko toRanaa achchhaa 
wo afsaanaa jise takameel tak laanaa na ho mumakin 
use ek Khoobasoorat mo.D dekar chhoRanaa achchhaa 
chalo ik baar phir se ajanabii ban jaayeN ham donoN 

[ta'arruf=acquaintance; ta'alluq=relationship; takameel= completion] 
 
tumheN bhii ko_ii ulajhan rokatii hai peshakadamii se 
mujhe bhii log kahate haiN ki ye jalawe paraaye haiN 
mere hamaraah bhii rusawaaiyaaN haiN mere maazii kii 
tumhaare saath bhii guzarii huii raatoN ke saaye haiN 
​

aaj kii shab to kisi taur guzar jaayegii - Parveen Shakir

aaj kii shab to kisi taur guzar jaayegii
raat gaharii hai magar chaaNd chamakataa hai abhii
mere maathe pe teraa pyaar damakataa hai abhii
merii saaNsoN meN teraa lams mahakataa hai abhii
mere seene meN teraa naam dhaRakataa hai abhii
zeest karane ko mere paas bahut kuchh hai abhii

terii aawaaz kaa jaadoo hai abhii mere liye
tere malaboos kii Khushboo hai abhii mere liye
terii baaNheN teraa pahaloo hai abhii mere liye
sab se baRhakar merii jaaN too hai abhii mere liye
zeest karane ko mere paas bahut kuchh hai abhii

aaj kii shab to kisii taur guzar jaayegii
aaj ke baad magar rang-e-wafaa kyaa hogaa
ishq hairaaN hai sar-e-shahar-e-sabaa kyaa hogaa
mere qaatil teraa andaaz-e-jafaa kyaa hogaa

aaj kii shab to bahut kuchh hai magar kal ke liye
ek andeshaa-e-benaam hai aur kuchh bhii nahiiN
dekhanaa ye hai ki kal tujh se mulaaqaat ke baad
rang-e-ummeed khilegaa ki bikhar jaayegaa
waqt parawaaz karegaa ki Thahar jaayegaa
jeet ho jaayegii yaa khel bigaR jaayegaa
Khwaab kaa shahar rahegaa ki ujaR jaayegaa

aao ki ko_ii Khwaab buneN kal ke waaste - Sahir Ludhianvi

aao ki ko_ii Khwaab buneN kal ke waaste
waranaa ye raat aaj ke sangeen daur kii
Das legii jaan-o-dil ko kuchh aise ki jaan-o-dil
taa-umr phir na ko_ii haseeN Khwaab bun sakeN

[bunanaa = to weave; sangeen daur = hard/difficult times]
[Das lenaa = to bite; taa-umr = entire life]

go ham se bhaagatii rahii ye tez_gaam umr
KhwaaboN ke aasare pe kaTii hai tamaam umr

[tez_gaam = fleet-footed]

zulfoN ke Khwaab, hoNThoN ke Khwaab, aur badan ke Khwaab
meraaj-e-fan ke Khwaab, kamaal-e-suKhan ke Khwaab

[meraaj-e-fan = (to reach) summit of art; kamaal-e-suKhan = perfection in poetry]

tahazeeb-e-zindagii ke, faroG-e-watan ke Khwaab
zindaaN ke Khwaab, koochaa-e-daar-o-rasan ke Khwaab

[tahazeeb-e-zindagii = civilized life; faroG-e-watan = nation's progress/upliftment]
[zindaaN = prison; koochaa-e-daar-o-rasan = road leading to the gallows]

ye Khwaab hii to apanii jawaanii ke paas the
ye Khwaab hii to apane amal ke asaas the
ye Khwaab mar gaye haiN to be-rang hai hayaat
yooN hai ki jaise dast-e-tah-e-sang hai hayaat

[amal = work; asaas = foundation; hayaat = life]
[dast-e-tah-e-sang = hands crushed under a stone (helpless)]

aao ki ko_ii Khwaab buneN kal ke waaste
waranaa ye raat aaj ke sangeen daur kii
Das legii jaan-o-dil ko kuchh aise ki jaan-o-dil
taa-umr phir na ko_ii haseeN Khwaab bun sakeN

ye zindagii - Nida Fazli

ye zindagii
aaj jo tumhaare
badan kii chhoTii-baRii nasoN meN
machal rahii hai
tumhaare pairoN se
chal rahii hai
tumhaarii aawaaz meN gale se
nikal rahii hai
tumhaare lafzoN meN
Dhal rahii hai

ye zindagii
jaane kitane sadiyoN se
yooN hii shakleN
badal rahii hai

badalatii shakloN
badalatii jismoN meN
chalataa-phirataa ye ik sharaaraa
jo is ghaRii naam hai tumhaaraa

isii se saarii chahal-pahal hai
isii se  raushan hai har nazaaraa

sitaare toRo
yaa ghar basaao
alam uThaao
yaa sar jhukaao
tumhaarii aaNkhoN kii raushanii tak hai khel saaraa
ye khel hogaa nahiiN dobaaraa

alam = flag (of war)

Sparsh - Gulzar

Quran haathoN meN leke 
naabeenaa ek namaazii
laboN pe rakhataa thaa
donoN aaNkhoN se choomataa thaa
jhukaake peshaanii yooN aqeedat se chhoo rahaa thaa
jo aayateN paRh nahiiN sakaa 
un ke lams mahasoos kar rahaa ho

maiN hairaaN-hairaaN guzar gayaa thaa
maiN hairaaN hairaaN Thahar gayaa hooN

tumhaare haathoN ko choom kar
chhoo ke apanii aaNkhoN se aaj maiN ne
jo aayateN paRh nahiiN sakaa 
un ke lams mahasoos kar liye haiN

nayaa shiwaalaa - Allama Iqbal

sach kah dooN ai brahman gar too buraa na maane
tere sanam kadoN ke but ho gaye puraane

apanoN se bair rakhanaa too ne butoN se seekhaa
jang-o-jadal sikhaayaa waa_iz ko bhii Khudaa ne

tang aake aaKhir maiN ne dair-o-haram ko chho.Daa
waa_iz kaa waaz chho.Daa, chho.De tere fasaane

patthar kii mooratoN meN samajhaa hai too Khudaa hai
Khaak-e-watan kaa mujh ko har zarraa dewataa hai

aa Gairat ke parde ik baar phir uThaa deN
bichha.DoN ko phir milaa deN naqsh-e-du_ii miTaa deN

soonii pa.Dii hu_ii hai muddat se dil kii bastii
aa ik nayaa shiwaalaa is des meN banaa deN

duniyaa ke teerathoN se ooNchaa ho apanaa teerath
daamaan-e-aasmaaN se is kaa kalas milaa deN

har subah mil ke gaayeN mantar wo meeThe meeThe
saare pujaariyoN ko mai peet kii pilaa deN

shaktii bhii shaantii bhii bhaktoN ke geet meN hai
dharatii ke baasiyoN kii muktii preet meN hai

ko_ii ye kaise bataaye ke wo tanhaa kyoN hai - Kaifi Azmi 

ko_ii ye kaise bataaye ke wo tanhaa kyoN hai
wo jo apanaa thaa wohii aur kisii kaa kyoN hai
yahii duniyaa hai to phir aisii ye duniyaa kyoN hai
yahii hotaa haiN to aakhir yahii hotaa kyoN hai

ek zaraa haath baRhaa deN to pakaR leN daaman 
us ke seene meN samaa jaaye hamaarii dhaRakan 
itanii qurbat haiN to phir faasalaa itanaa kyoN hai

[qurbat=nearness] 

dil-e-bar_baad se nikalaa nahiiN ab tak ko_ii 
ek luTe ghar pe diyaa karataa hai dastak ko_ii 
aas jo TooT gayii phir se baNdhaataa kyoN hai

tum masarrat kaa kaho yaa ise Gam kaa rishtaa 
kahate haiN pyaar kaa rishtaa hai janam kaa rishtaa 
haiN janam kaa jo ye rishtaa to badalataa kyoN hai
 
[masarrat=happiness] 
​

mujhe tum nazar se giraa to rahe ho - Masroor Anwar

mujhe tum nazar se giraa to rahe ho 
mujhe tum kabhii bhii bhulaa naa sakoge 
na jaane mujhe kyuuN yaqiiN ho chalaa hai 
merii yaad ko tum miTaa naa sakoge 

merii yaad hogii jidhar jaaoge tum 
kabhii naGmaa ban ke, kabhii ban ke aaNsuu 
taRapataa mujhe har taraf paaoge tum 
shamaa jo jalaa_ii merii wafaa ne 
bujhaanaa bhii chaaho bujhaa naa sakoge 

kaabhii naam baatoN meN aayaa jo meraa 
to bechain ho ho ke dil thaam loge 
nigaahoN pe chhaayegaa Gam kaa andheraa 
kisii ne jo poochhaa sabab aaNsuoN kaa 
bataanaa bhii chaaho bataa naa sakoge 

The following 'band'  written by Kamraan Mehdi is often sung by Mehdi Hasan. 

mere dil kii dhaRakan banii hai jo sholaa 
sulagate haiN armaaN yooN ban-ban ke aaNsoo 
kabhii to tumheN bhii ye ehasaas hogaa 
magar ham na hoNge terii zindagii meN 
bulaanaa bhii chaaho bulaa naa sakoge 

baat nikalegii to phir door talak jaayegii - Kafeel Aazer

baat nikalegii to phir door talak jaayegii
log bewajah udaasii kaa sabab poochhenge 
ye bhii poochhenge ki tum itanii pareshaaN kyooN ho 
uNgaliyaaN uThengii sukhe huye baaloN kii taraf 
ik nazar dekheNge guzare huye saaloN kii taraf 
chuRiyoN par bhii ka_ii tanz kiye jaayenge 
kaaNpate haathoN pe bhii fikre kase jaayenge 

log zaalim haiN har ik baat kaa taanaa denge 
baatoN baatoN meN meraa zikr bhii le aayenge 
un kii baatoN kaa zaraa saa bhii asar mat lenaa 
warnaa chehare ke taasur se samajh jaayenge 
chaahe kuchh bhii ho sawaalaat na karanaa un se 
mere baare meN ko_ii baat na karanaa un se 

baat nikalegii to phir door talak jaayegii 
​